UNIVERSITÄTSBIBLIOTHEK SALZBURG
Handschrift M I 29 (Fechtbuch)
(146v-158r) Fechtlehre für den Schwertkampf zu Pferd
(146v) Item Hie heben sich an die fier hutten mit dem Swert zuo roß
Die erst hut
Item lege din swertt mit der mit uff die lincke hant zuo dem zaüm.
Die ander hut
Item Halt din swert nebent dir an dem rechten peyn und daß der ortt ubersich ste gegen dem man.
Die dritt hut
Item Setz den knopff dines swertz an den sattelbogen und halt den ortt gegen dem man.
Die vierd hut
Item Halt din schwert hoch auff diner rechten syten daß din thüm unten sey und heng Im den ortt zu dem gesichtt.
Item waß du auß den vier hutten fechten solt dau findest hernach geschreben, die stuck tribe auß der ersten hutenn von dem lincken arm.
Ob sich verwandelt
Daß swertt gegen swert wut (!) gehandelt
Recht vaß die stercke
Tachsen hauwen süch und merck.
(147r) Item Daß ist ob ir beyde von den gleffen wertt kümen und wie daz zu gangen were e er zu sinem swert kümen were und du zu dynem.
Item So Rytt zu diner rechten siten und lege din swert auff din lincke hant, hautt er daruff auff dich in ober hauw, so fohe In hoch auff mit dinem swert und versetz den hauw mit der langen schniden in die sterck dineß schwertz, daß der ortt zu siner rechten siten stee und Indes stich noch dem hals, fert er hoch auff mit der hoch versatzung und wertt den stich, so hauw In mit der langen schniden noch dem zaüm oder nach der lincken hant und Rytt nebent Im hyn wegt.
Item ob daß roß dich uber trage daß Im die hant noch dem zaüm nit erlangen magst, So hauw Im noch dem rechten peyn In dem hyn rietten.
Figura vii
Item daß lert die syben figura: Hie heb an den teschen hauwen zu suchen.
Item wen du Im den hauw versetzt als vor und wilt der fordern stuck nit triben, so fal im mit dem knopff Inwendig uber sin rechte hant by dem gehultz und truck die fast an die brust und Rytt fur dich, So nympstu Im sin swertt und die stuck tribe auß der vierden huten von der rechten sytenn.
(147v) Ler wol schuetten alle treffen an for
Do mit in not an setz verstreiff heng
im zuo dem hore.
Item Hie merck wie du den mann zwyngen solt daß du ym eyn forteill an gewynst und daz du Im mit sterck do zwingest, du In mit daß er sich müß ploß geben daz wieset die funfft figura.
Item daß ist daz du solt In allen pynden solt starck seyn mit der gleffen undn mit dem swertt und alwegen mit dem ortt daz gesicht nemen, daz lertt die 19 figura.
Figura fünff
Item Daß Schutten fur hencke allen treffen hauwen und stechenn.
Item Wan du starck pist so merckstu woll ob er weich oder schwach ist und daz ist daß fullen oder entpfindenn.
Item Hauw Im eyn ober hauw zu dem kopff starck, versetz er und ist und ist (!) weich Im swert, So setz Im den ortt auff syn lincke siten, so far von unten auff durch syn swert mit dem knopff umb synen hals, so fellet er.
Item versetz er dan den ober hauw hoch, So nym den Schoff grieff.
(148r) Item versetz er den hauw, So tribe dy Sonnen zeychen mit dem Swertt under den kynbacken.
Item hauw Im aber eyn ober haue zu dem kopff, vert er hoch auff mit der versetzung, So far mit dinem gehultz under synen elnbogen und mit dem rechten fuß under syn styeckleder und stos oben mit dem gehultz und schutten mit dem fuß, so felt er.
Item versetz er dir den ober hauw mit der wer, So far hoch auff mit diner rechten hant und heng Im den ort uber sin swertt und zu sinem gesicht oder brust und setz Im ann.
Figura iiii
Item wan er dir versetz mit der zwuerch, So far hoch auff mit diner rechten hant und far Im mit dem swertt durch synen rechten arm und begriff Im synen arm mit dynem und Ryett fur dich, So nympstu Im daz swertt. Das lertt die vüerde figura.
Item die stuck soltu triben auß der neben huot by dem rechten peyn.
(148v) Wiltü gerüett
Lang sagen das sere muett
Wer daß werett
So winde daß auch sere verseret
Wert er furbas
Vach den zaüm und biß nit laß
Item Wan du Rittest mit der hutt zu dem man, So stich gericht fur dich lang auß gerechten armen dem man zu dem gesicht oder der brust, So mueß er versetzen.
Item Wan er dir den stich versetz und wiesett den ort besitz auff uff sin lincke siten, So far mit dem rechten arm hoch auff In daß ober gehenck, stich ym zu dem gesichtt.
Item were er dan starck und fertt hoch auff, So Ritt an In und far mit diner lincken hant von Inwendig auff uber sin rechten arm und begriff den zaüm unter sinem rechten arm und mit der lincken verkerten hant, so hastu In gefangen by dem arm.
(149r) Gedenck die ploes
Suech messer nit wartt der kloes
Item Daß ist wan du In mit dem zam also gefangen hast als vor geschriben stett und ist gewappett, So soltu wissen wo du In ploß vindest also daz du In gewindest muogest.
Item also such die ploß: Ein under den uchsen und die ander ußwendig indie hohe Schuoch oder knye.
Item die drytt In der gelenck der arm pruch oder under dem gesicht.
Figura x
Item die ploß soltu suchen mit dem ortt deß swertz, auch mit dem knopff dem gewappenten man nit geschaden. Daß lertt die x figura.
Item die stueck tribe auß der hutt von dem sattell bogen.
Item wan du mit der hutt Ryttest In den man, hauwett er dir dan zu dem kopff von siner rechten siten eyn ober hauw, So far mit dem swertt auch auff von der sattell bogen und wind do mit hoch (149v) fur daß haupt das er dan unten küm auff din lincke siten so sechstu (!) dan hauw in dem gehultz Indes stich Im zu dem gesicht zu siner lincken siten, so fechstu dan hauw In dem gehultz.
Item weist er den stich ab zu siner lincken siten, So rytt neben hin Im wegt und hauw in mit der langen schniden hinden In den hals und daz ist der tueckist schlagt.
Item wan er die den stich ab weist zu siner lincken siten und wiltu den tuechsch hauw nit triben, so rytt nit fur in und gar im mit dem knopff aussen uber sin rechten hant und stos in mit dinem gehultz fur dich und mit der lincken hant begriff syns swertz knopff und Rytt fur dich, so nympstu Im das swertt.
Item Hautt er von siner lincken achsell uff dich eynen ober hauw, So wind mit dem swert hoch ubersich auff die rechte siten gegen synen hauw und stich Im zu siner rechten siten gegen synen hauw zu siner rechten sytten zu sinem gesicht.
Item Ritt eyner uff dich mit der gleffen und an welcher siten er dir will an setzen, So wind gegen Im mit dem swert an sich gleffen als for und stich Im zu dem gesicht oder wo du In magst erhaben.
(150r) Figura viii
Item das lert die acht figura die spricht: Wind Im die rechte hant, setz im den ort zu dem gesicht und daz ist daz du alwegen solt winden mit dem swert zu roß auß der hutt, es sie gegen der gleffen oder gegen dem swertt, Indes dem man stechen zu der plos.
Item und wan du Im zu der ploß stechest, wertt er dan den stich und kümpt nahent an dich, So begriff sin rechte hant mit diner lincken und tribe die ringenn die vor und noch geschriben stan.
Figura ix
Item daß lernt die nünde figura die Sprichtt: Wer den stich werett, fach sin rechte hant in din lincke.
Daß ist eyn hut mit
dem langen swertt
Item Wan du hast gelegt daß swertt auff din lincke hant zu dem zam, so loß den zam faren und griff mit der lincken hant mitten in die clingen und halt din swertt wie vor.
Item Ritt eyner zu der rechten siten auff dich mit der gleffen, so setz ab mit dinem swertt von diner lincken hant und schlag din swert under din uchsen und setz Im an.
(150v) Item Ritt er zuo diner lincken siten mit der gleffen, so far hoch auff mit dem knopff und loß den ortt hangen zu siner lincken siten und setz also ab und setz Im an.
Item leyst in der hut und hauwet er dir oben zu, so far hoch auff und vahe den hauw zwischen din beyde hende und heng Im den ortt dem gesicht und setz im an.
Item auch machstu In mit dem halben schwertt ab setzen waz uff dich gestochen wartt, es sy mit der gleffen oder mit dem swert, dar ümb soltu mit der linkchen hant din swert ouch zu hilff kümen, wan es dir nott ist als der gleffen, als die sechst figura lernett.
Zwen stich lere
Mit lerer hant gegen der were
Item Daß ist die aller best künst als sie in dem ros fechten sin mag und ist verborgen und get zu mit der lincken hant und darümb soltu wissen den zam auß zu richten daz du die lincke hant magst frye gehalten wan du wilt und denoch dins roß magst moechtig gesin mit dem zam und daz ist gearbeytt mit lediger hant.
(151r) Figura xii
Item Wan mit der rechten hant müstü die gleffen oder daz swertt halten dar umb lernt die xii figura: Mit lerer hant zwen stich gegen allen weren.
Item waß künst du mit lediger hant solt triben gegen der gleffen oder gegen dem swertt oder mit Ringen daß finstu in den glosen alles geschreben.
Der Schoff griff werett
Wer sich ringen zu dir keret
Als untter augen
Griff In an recht mit slaugen
Item Merck daß ist der recht und pesten ringen eins als es zu roß gesin mag, dar umb heist es der schoff griff daz es nit yder man verston mag.
Item oder in den glosen heist der schopff griff wan der schopff ist der recht arm dines wider sachen, so soltu alwegen noch griffen wan du zu roß ringest wen er mit der lincken hant halt den zam, die ist dir nicht also schedlich.
(151v) Item du solt wissen daß ringen glich vorn zuo dem man zu gett under augen zu siner rechten hantt.
Figura xiii
Item Wiltu Ringen so reit dem man zu der rechten siten und griff in an mit ringen, grifft er dich wider an so begriff mit diner lincken hant sinen rechten arm fur dich und far mit dem rechten arm uber und truck do mit nyder und begriff do mit den sattell bogen und Ritt fur dich, so müß er fallen und wyß daz du mit dem ringen bruchest alle ringen, do mit man dich forn an fellett, dar umb spricht die xiii figura: der schopff griff werett alle griff ringes untter augen.
Item magstu In triben wan du zu siner lincken siten zu Rittest wan er sich will weren mit der lincken hantt.
Wer dich an fellett
Wider Ryttens der wurt gefellet
Hanges gen der erden
Uber griff Im recht mit gewerden
(152r) Item Daß ist ein schlechtes Ringen, Reitt dannen zuo der rechten Siten und fert dir mit seinem rechten arm umb den hals, fur im auch also umb den seynen und halt in fast hinden by diner (!) iüppen oder waß er an hat und henck dich nyden uff die lincke siten als du von dem roß wollest fallen und ziech In also noch dir von dem roß, hastu dich zu sere nyder gehangen daz dich dinck du müst auch fallen, so halt in fast so zucht er dich wider hin in den sattell mit sinem fall.
Zuo beyden seytten
Kere dich an In an wyder Rytten
Item Merck [durchgestrichen: ist] daß ist daz du dich an allen an Ritten nohent zu dem man solt halten, wan du dich zu roß mit eynem vahen wilt oder ringen, etliche hoffluett tribe Ire stueck an dem zuo ritten zu dem man, dar umb wan du an den man kümpst, so plybt by Im und loß In zu keynen dingen nach stuecken kumen.
Item Merck Rittest du Im zu siner rechten siten, so trib die stueck die zu der rechten siten gehoren und also mag er zu keynen stuecken kümen.
Ob du wilt Ryttenn
Roß laüfs zur andern sytten
(152v) Die stueck schott
Do mit In nott
Were dir werett
Swert fache trage nahe der hant
Item daß ist wiltu enc (?) uff sin lincke siten ritten, So soltu starck sin mit der were, eß sy gleffen oder swertt, und wart ob du dem man den ort magst an setzen, do soltu In mit zwingen glich als du Im zu der rechten siten hast gethon, do mit zwingstu In mit den stucken die man zu der lincken siten triben soll, wan eß sin ettlich stueck die man zu der lincken siten tribtt die zu der rechten seytten nit mogen gen.
Figura xix
Item dar umb Spricht so die nünzehendt figura: Schutt gegen allen treffen die ymer werden daß ist du solt stercken In allen an pynden.
Item wan du dem man zu siner lincken sytten mit eynem ober hauw, so stech Im noch der ploß mit gestraccktem armem und haut er mit dynem glich yn und ist starck mit dem swertt und will dich uber stercken und suecht dir die ploß auch mit dem ortt, so far mit dynem lincken arm von Inwendig aussen uber
Figura xv
(153r) sin swertt und trueck daz fast in din lincke syten und Ritt neben Im hin weck, so nympstu Im daz swert und daß lerent die xv figura die Sprich: die were foch In die mitte In der wider Ryttenn.
Item ob du nohe an In kümpst, so far mit diner lincken hant uff sin rechte hant und loß in do mitt nit zu were kümen und tribe mit der lincken hant die stuck und Ringen die vor und noch geschreben stentt.
Oder umb kere
Gerut zuo sagen der were
Mit allen künsten
Der do saget der schick noch günsten
Item Wan du mit eynem zu der lincken siten zu rittest und dich din roß vorn truck daz du zu dem vorgeschreben stück nit kümen magst, So loß din roß nit ver vom Im lauffen und wurff din roß umb auff din lincke siten also daz du mit diner sytten an sin rechte komest und tribe die stueck und die ringen und alle künst die zu den rechten siten gehoren die do vor geschreben sten.
Figura xvii
Item das lerent die xvii figura Sie sprichtt: Jage zu der rechten hant mit yren künsten.
(153v) Ob dü ver jagest
Und on danck lincke jagest
Sein swertt auff tast
Ring und stos mit vast
Item Merck daß ist ob din roß also hort mügelich were oder daz sich din wider sach also gen dir weret daz du an danck zu siner lincken siten zu rytten, so lege din swertt in die hutte uff din lincke hant.
Item hautt er dir dan oben zu dem kopff, so far auff und versetz mit der langen schniden und kümestu mit der versetzung nohent an In, so far mit dinem lincken arm uber sin rechte hant und truck sie vast uber die lincke syten und stos yn mit dem knopff wo du hin willtt.
Figura xvi
Item daß lernett die xvi figura die Sprichtt: Jagstu linck so fall auff swertz kloes stos under aügen.
Item du Im sein rechten arm In die lincke sitte truckest, So ritt nebent Im hin wegt, So müß er daß swert loßen fallen.
Item magstu mit der lincken hant in sin recht mit dinem zam vahen und do mit hyn weg Ryttenn.
(154r) Item versetz Im den ober hauw als vor auß der hutt und Ritt nebent Im hin weg und schlag in mit eynem fryen ober hauw zu dem kopff.
Item jagett er auff dich mit eyner gleffen wan du in der hut ligest, so far hoch auff mit der rechten hant mit knopff auff din lincke siten und loß den ortt nebent dir nider hangen und wise Im die gleffe also uber ab und hauw im zu dem kopff oder setz Im an zu dem hin rynnen.
Item kümestu nohe an In mit der lincken siten und will er sclagen (sic) mit dem swertt, So nym daß sonnen zweychen, so mag er sin nit gethün.
Item Auch magstu den schoff griff nemen wan er er (!) sich mit der lincken hant weren will.
Item koeme er mit siner lincken siten in din recht und wolt dich mit dem sonnen ziechen werffen und ist er stercker dan du, so far von Inwendig auff uber sin lincke arm mit dinem rechten oder ist er swecher dan du, so far aussen uber sin lincke arm und küm mit diner lincken hant der rechten zu hulff und truck fast nyder und weichtt er aber mit dem arm, So begriff In mit der lincken hant und mit dem rechten starck dan uber und Rytt fur dich, so felt er.
Item hat er sinen lincken elnbogen an dinem rechten arm gesetz, so begriff sin lincke hant mit diner lincken und nym den ungenanten griff.
(154v) Jagt man dich rechtes
Kere umb wartt fechtes
Mit armen vahen
Sa mag dir keyn schade nohen
Item daß ist daz du merckent solt, wan du mit eynem zu samen reytten solt, ob er dir zu der rechten siten wol zu Ritten und dir den vortell an gewunen, So loß in dar zu nit kümen, Sünder wind dich alwegen mit diner lincken siten zu diner rechten und wart daz du nohe an In kümest und wartt sines rechten arm mit dem Ringen und senck die vor und noch geschriben ston.
Item wer daß sach das du getrüngen wurst, daß du flyhen müst und Rit dir dan eyner hinden zu diner rechten siten mit eynem Spiß oder swertt und will dir an setzen, So wind dich auß dem stich gegen Im auff die lincke siten und wind mit dinem swert gegen sinen spiß oder swertt daz din thüm unden kome und setz Im an.
Item Ryett er dir zu der lincken siten, So wind dich auff din rechte siten gegen Im und wind mit dem swert als vor und setz Im an.
Figura xxiii
Item daz lernett die dryundzwentzig figura die spricht: Ob man dich jagett von beyden siten, kere umb linck, So er recht kompt.
(155r) Item auch soltu in der flucht behende sin also daß du dich woll konest umb gewinden in dem sattel von eyner siten zu der andern und mit dem hinder stechen zu beyden siten.
Die swert nemen
Behalten lere one schemen
Item Hier merck wie du eynem sein swert solt nemen und in dar zu behalten daz er sich nit geweren mag.
Item Ruett zu der rechten siten und such sin ploß wie du magst mit hauwen und mit stechen, versetz er und komet nohe an dich, So begriff sinen rechten arm hinder sin rechten hant mit diner lincken und verkerten hant und ruck dan vor dich und halt in fest heyn pey und pyge din lincken arm [durchgestrichen: aß] außwendig an sinen wind sines swertz, so müß er daz swert loßen und wan du In also bey dem arm haltest, So mustu In mit dem swert oder mit dem schoff griff werffen, wie du wilt oder mit dem zam fohenn.
Figura xxv
Item daß lernett die xxv figura und Spricht: Die messer nemen behaltent und gedencke (?).
Den ungenanten den starcken
Ver wintt Ir stechen
Ir schlagen verdirpt on alles vechten
(155v) Item Hie merck wan du eynen starcken solt daz er zu keyner were komen mag und daz stuck tribe wan du mit diner lincken siten an sin rechte komest.
Item und wan du mit diner lincken siten an In komest und hat er dan sin were gezochen, es sey swertt, messer oder tegen, und will dich schlagen oder stechen, So begriff mit diner rechten hant sein rechte arm vorn by der hant unnd reib Im dan umb und ruck den untter din brust und lege dich mit dem lieb hart auff, So prichstu Im den arm, daz ist der ungenant griff.
Item wiltu den arm nit brechen, wan du In hast getruckett under din brust, So griff mit diner lincken hant an sin rechten elnbogen und stoß in do mit von dir und begriff mit diner rechten hant seyn swertt by dem knopff oder by der hant haben und zuck do mit an dich, so nympstu Im das swertt.
Figura xxii
Item daß lernett die zwenundzwentzig figura die spricht: Der ungenant griff oder war [recte: wer?] nympt oder felt Im.
Wiltu an fassen
Neben reitten daß soltu nit lossen
Das sonnen zeichen
Den lincken arm wiltu naigen
(156r) Daß vor haupt tast
Gegen nack druck vast
Daß er sich schwencket
Und selten wider uff glencket
Item daß ist fassen dinges Ringen magstu triben zu allen zitten wan du an den man komest.
Item daß tribe also kompstu mit der rechten siten an sin rechten wan ir zu samen ritten, so halt dich vast an In und griff mit diner lincken hant hinden umb in und begriff In do mit sinem lincken arm und zuch In vast herumb zu dir und mit diner rechten hant griff in unten an seyn kynbacken und stos In dan vast von dir uber sich auff sin lincke siten, so kerstu Im sin antlutz auff gegen der sonnen zeychen, do mit gewinstu Im den swanck an, daß er sich nit mag gehalten, wuerff In fur dich von dem roß.
Figura xiiii
Item darümb Spricht die xiiii figura: In der nehe stich die hant, verkere sin antlutz do der nack ist.
Item daß Ringen heysset daß sonnen zeichen dar umb daß es yder man nicht vernemen soll wan eß ist verborgen.
Item kompstu mit der lincken siten an sin rechte, so begriff also vor und wurff In hinder dich uff sin lincke siten
(156v) Wer dir do remett
Uber griff der württ beschemett
Truck arm zu haupt
Der griff off sattell beraüptt
Item Merck hie lernet er wie man daz sonnen zeichen bruchen sol und der bruch ist mere dan eyner und sint auff schwach und auff starck leutt.
Item kompt eyner mit siner rechten siten an din rechte und ist starck und will dich werffen mit dem sonnen zeichen und wan er dir griffet mit der rechten hant an din kynbacken, so schlag din rechten arm oben uber sin rechte und druck In vast an din brust und leg dich mit dem lieb dar auff und ritt fur dich, so wurffstu In.
Item kompt er mit siner lincken siten an din rechten und hat begriffen din lincke arm mit siner lincken hant, So wind dich gegen Im far (?) gerichs Inwendig auff mit dem rechten arm und truck In hinden mit der sterck dines arms sinen arm hyn wege und schlag den arm do mit uber sin und Ritt for dich.
(157r) Item ist er nit starck und kompt mit siner lincken siten an din rechte und grifft mit siner lincken hant noch diner lincke, so far von unten auff hinder dich uber sin lincke und reck den arm gerichs auff und druck In do mit sinem vast hinden by seinen nacken und ritt for dich.
Item wiltu den arm nit auff rechten, so schlag im uber sin arm und truck vast nyder.
Item Auch magstu mit dinen rechten arm von Inwendig auff uber sin lincken schlagen und hinden an dich trucken und hynweg ritten.
Wiltu Aber dich moßen
Daß vohes luecht von dir loßen
Ringest dan fore
Gefangen hin an schnüre
Item daß ringen heissett daz verborgen Ringen und ist der besten eins wan es glichet sich woll dem schoff griff wan du do mit eynen haltest, er sy starck oder schwach, und magstu In also halten (157v) daß er sich nit geweren mag wie lang du wiltt wan du In recht begriffest.
Item wiltu aber thün als die leuchtfertigen meinster, die ir künst gerin wegen durch rüms willen und machen die künst gemeyn die sie konen oder wissen, dar umb werden sie undbeholen von andern wissen meinstern und von rittern und knechten.
Item wiltu daß Ringen offenbar machen oder yderman sehen loßen, So thün Im also: Rytt mit diner lincken siten an sin rechte und griff mit diner rechten hant sinen rechten arm vorn by der hant und druck den vor dich und ritt umb und begriff mit diner lincken hant an sinen rechten elnbogen und stoß den von dir und mit der rechten hant Stoß sin rechten arm uber den lincken arm gar woll und hebe also mit dinem lincken arm sinen rechten uber sich aüff und also hastu In gefangen und gebünden one alle bandt und magst In also halten wie lang dü wilt, daz geth zuo beyden syten zuo.
Den vorgriff merck
Der bricht furbas sin sterck
Item Merck daß daß du alwegen solt vorkonen (sic) e dan er mit dem griffen zu ringen die dü woll vernümen hast und zuo vor auß mit den vier haupt Ringen, do lest er Im nit zu keynem ringen oder stuecken komen, daß ist der schoff griff, der ungenant griff, der sonnen zaichen, der ungenant griff, der sonnen zaichen (!) und der verborgen griff und daß vohes mit dem zam soltu auch so mit nit vergessen und wan du die Ringen woll kanst, So mag dich hartt yman von dem roß werffen.
Finis in die vincule Petre (!)
.m.
Hans von Spier 1491.
(158v-161v) leer