UNIVERSITÄTSBIBLIOTHEK SALZBURG

Handschrift M I 29 (Fechtbuch)

(5r-7r) Magister Andreas: Fechtanleitungen für Schwert und Messer

(5r) Im Schwertt

Item In den ochßen schick dich also, ste mit dem lincken fus vor und halt din schwertt uff diner rechten siten mit dem gehultz fur daz haupt daz die kurtz schnide gegen dir ste und halt Im den ortt also gegen dem gesicht.

Item zu der lincken siten schick dich also in den ochsen, ste mit dem rechten fus vor und halt din schwert zu diner lincken siten mit dem gehultz vor daz haupt daz die lang schnide gegen dir ste und halt Im den ort also gegen dem dem (!) gesichtt. daz ist der ochß uf beyden siten.

Item die zwo hutten oder leger bricht der krümpt hauw und wie du den machem (sic) solt vindestu Im zyttell.

Im Messer

Item Im messer machstu auch die zwo hutten machen und schicken als Im schwertt, sunder mit eyner hant und die ander uff den rucken und disse hut oder leger heist Im messer der stier und Im schwert der ochß.

Item die zwen hutten oder leger bricht der wecker hauw und wie du den triben oder machen solt vindestu Im zyttell.

(5v) Im Schwertt

Item die ander hutt die hiest der pflug, schick dich also, setz den lincken fus vor und halt din schwert mit gekrueczten henden untersich zu diner rechten mit dem knopff neben diner rechten huefft, daz die kurtz schnid oben sy und der ortt fursich auch sten dem man gegen dem gesichtt.

Item zu der lincken siten schick dich also in den pflug, setz den rechten fus vor und halt din schwertt neben diner lincken siten under sich zu diner lincken hueff daz die lang schnid oben gewant sy und der ortt uber sich ste dem man gegen dem gesichtt.

Item die zwyn leger oder huotten bricht der schiller hauw und wie du den triben oder machen solt vindestu Im zyettell geschriben.

Im Messer

Item Im messer heissent die leger oder die zwo hutten der eber und schick dich also, Setz dinen lincken fus vor und halt din messer by dem rechten peyn uff der rechten siten mit dem gehultz neben der huff daz die (6r) stumpf schnide oben ste und der ortt fur sich uff ste dem man zu dem gesichtt.

Item die zwyn leger oder hutten brichtt der zwinger und wie du denmachen soltt vindestu Im zyttell.

Im Schwertt

Item die drytt huot oder leger Ist vom tage, schick dich also, setz den lincken fus for und halt din schwert hoch uff mit gestreckten armen uber din haupt und die lang schnid fur und loß den ortt eyn wenig zuo rueck hangen und ste also in der huott.

Item die huot oder leger bricht der zwuere hauw und wie du den machen solt vindestu Im zyttell geschriben.

Im Messer

Item Im messer ist die huot oder leger genant lugginßlantt und schick dich also, setz dinen lincken fus vor und halt din messer mit uff gereckten armen hoch vor din haupt und die lang oder scharff schnid fur ste und ste also in der huot.

Item die huot oder leger bricht der hauw der do heißt im messer der Entriesch hauw.

(6v) Im Schwert

Item die vierd hut oder leger Im schwertt der do heißt der alber, In den schick dich also, setz den lincken fus vor und halt din schwert mit gestrackten armen vor dir mit dem ortt uff der erden daz die kurtz schnide oben sy.

Item yttlich meinster sprachen daz der leger heiß die ysen pfortt und ist doch eyn leger.

Item die hut oder die leger brichtt der schyttler hauw und wie du den machen oder tribent solt vindestu Im zyttell.

Im Messer

Item die vierd hut oder leger Im messer der heisßt die pastey, schick dich In die also, setz dinen lincken fus vor und halt din messer mit gestrackten arm vor dir mit dem ortt uff der erden daz die kurtz schnid oben ste.

Item die hut oder der leger Im messer bricht der schyttler hauw und wie die die stuck uß den vier hauwen triben solt vindestu als Im zyttell geschriben, darumb hut dich.

(7r) Magister Andreas

Item wie du die vier hauw triben solt gegen den vier hutten oder leger vindestu do vorn geschriben, darumb hutt dich.

Frisch uff mir und dir.

(7v-9v) leer